Халықаралық Олимпиада комитеті (ХОК) мойындаудан бас тартқан IBA ұйымының президенті, ресейлік Умар Кремлёв қазақстандық боксшы Ангелина Лукасқа қаржылай қолдау көрсетті.
Ол Лукасқа WBA Gold World белбеуі үшін өтетін жекпе-жек алдындағы жаттығу лагерін қаржыландырып, дайындық шығындарын өз мойнына алған.
Қазақстандық әлем чемпионы, WBC тұжырымы бойынша алтын белбеу иегері Ангелина Лукас бұл жаңалықты өз Instagram парақшасында жариялады.
«IBA – менің бокс отбасым. Көп қиын сәттерде маған әрдайым көмектескен Умар Кремлёвке алғысым шексіз. Қазір ол WBA белбеуі үшін дайындық лагеріме қаржылай көмек көрсетті», – деп жазды боксшы.
Ангелина Лукас — рингтегі өнерімен қатар, қазақстандық жанкүйерлер арасында ең тартымды спортшы ретінде де танымал. Оның кәсіби мансабындағы әрбір қадам әлеуметтік желілерде кең талқыланады.
Еске салайық, IBA (Халықаралық бокс қауымдастығы) 2023 жылы Халықаралық Олимпиада комитеті тарапынан ресми мойындаудан айырылған болатын. Себеп — ұйым ішіндегі басқару дағдарысы мен қаржылық ашықтықтың болмауы.
Соған қарамастан IBA боксшыларға қолдау көрсетуді жалғастырып, кейбір ұлттық спортшыларды жеке демеушілік арқылы қолдап келеді.
