Америкалық танымал жаттықтырушы және бокс сарапшысы Тедди Атлас орта салмақтағы бұрынғы әлем чемпионы Геннадий Головкиннің (GGG) карьерасына қатысты өз сыни пікірін білдірді.
Атлас DontaesBoxingNation арнасына берген сұхбатында Головкиннің шынымен элиталық деңгейдегі қарсыластармен толық тексерілген-тексерілмегеніне күмән келтірді. Ол Головкин рингке шыққан боксшыларды сенімді түрде жеңіп отырғанын мойындағанымен, оның «теңдессіз» деген статусына әрдайым скептикалық көзқараста болғанын айтты.
«Ол (Головкин) элиталық деңгейде шегіне дейін сыналды ма?.. Жоқ, сыналған жоқ. Бірақ ол рингке шыққан қарсыластарын өз деңгейінде жеңді. Адамдар оны жаралмас монстр деді, бірақ мен оған ешқашан сенбедім. Кейін Лемьемен айқасын көргенде де жұрт „О, қандай боксшы“ деп шулады, ал мен болса бәріне салқынқандылықпен қарадым»,— деді Атлас.
Сонымен қатар, ол Головкиннің жетістіктері оны бокс аңыздарының қатарына қосуға жеткіліксіз екенін атап өтті. Атақты чемпиондардың атын атады:
"Джейк Ламотта, «Шугар» Рэй Робинсон, Карлос Монзон, Марвин Хаглер — және: «Бұл оны Ламоттамен тең деңгейге қоя ма?.. Жоқ", — деп түйіндеді Атлас.
Геннадий Головкин соңғы рет 2022 жылдың 17 қыркүйегінде Лас-Вегаста рингке шықты. Мексикалық Сауль «Канело» Альвареспен үшінші жекпе-жегінде қазақстандық боксшы төрешілер шешімімен жеңіліп қалды. Бұл жеңіліс оның карьерасындағы маңызды кезең болып, көпшіліктің пікірінше, оның элиталық деңгейдегі белсенділігіне нүкте қойған айқас болды.
