АҚШ-тың Лонг-Бич қаласындағы Thunder Studios аренасындағы бокс кешінің басты айқасында WBO нұсқасы бойынша екінші ең жеңіл салмақтағы (52,2 кг) әлем чемпионы Мидзуки Хирута (10-0, 2 KO) мексикалық Глория Гальярдоны (16-4-3, 7 KO) сенімді түрде ұтып, белбеуін қорғады.
Мэнни Роблестің шәкірті саналатын жапониялық Мидзуки Хирута алғашқы раундта сақ болып, қашықтықты дәл өлшеді. Джебпен қарсыласын «оқып» алған соң, өзінің жылдамдығы мен техникасының артықшылығын бірден көрсете бастады.
Хирута 5-раундта Гальярдоны ауыр соққысымен шайқап, мексикалық боксшының бетін жарақаттады. Гальярдо тек қайсарлығының арқасында жекпе-жекті жалғастыра алды. Бірақ айқын басымдық қарсыласының жағында болды.
Он раунд бойы Хирута толық үстемдігін сақтап, қарсыласына еш мүмкіндік берген жоқ. Төрешілердің барлық карточкаларында есеп бірдей болды:
100–90, 100–90, 100–90 — Мидзуки Хирута (UD 10)
Бұл нәтижемен жапониялық чемпион өз белбеуін сенімді түрде қорғап, жеңіліссіз сериясын жалғастырды.
