АҚШ боксшысы Вито Мельницки-кіші (22-1-1, 14 KO) Эр-Риядтағы кеште орта салмақтың WBO Global вакантты белбеуін жеңіп алды. Ол осыған дейін жеңілмеген нигериялық Сэмюэл Нмомаға (21-1, 5 KO) тосқауыл қойып, техникалық нокаутпен жеңісті қоржынға салды.
10 раундқа жоспарланған тартысты кездесу тоғызыншы раундта мерзімінен бұрын тоқтатылды. Нмома ауыр нокдаунға түскеннен кейін рингке қайта тұра алмады. Рефери жекпе-жекті дереу тоқтатып, Мельницкидің жеңісін тіркеді.
Нокаут сәтінің видеосын төменнен көруге болады.
Бұл нәтиже Сэмюэл Нмома үшін кәсіби мансабындағы алғашқы жеңіліс болды. Ал Мельницки 22-ші жеңісіне жетіп, өз көрсеткішін нығайтты: 22 жеңіс, 1 жеңіліс, 1 тең матч.
Айта кетейік, орта салмақ санатында Қазақстанның мақтанышы, әлемнің екі нұсқасы бойынша чемпионы — Жәнібек Әлімханұлы (17-0, 12 KO) да өнер көрсетеді. Ол қазір WBO және IBF нұсқалары бойынша әлем чемпионы белбеулерін ұстап келеді.
