Әліби Ыдырыс UFC октагонына шығып, жекпе-жек өткізді. Қарсыласы – тәжірибелі Оди Осборн.
Қазақстандық файтер Әліби Ыдырыс (10-1) UFC-дегі алғашқы жекпе-жегін өткізді.
Ол АҚШ-тың Техас штатындағы Хьюстон қаласында өткен UFC Fight Night 267 турнирінде өнер көрсетіп, америкалық Оди Осборнмен (13-9) айқасты. Жекпе-жек аса жеңіл салмақта өтіп, үш раундқа жоспарланған болатын. Қорытындысында Ыдырыс төрешілердің бірауыздан шығарған шешімімен жеңіске жетті.
Осылайша, Әліби Ыдырыс кәсіби мансабындағы он бірінші жеңісіне қол жеткізіп, UFC-дегі дебютін сәтті өткізді. Ал оның қарсыласы Оди Осборн профи-ММА-дағы оныншы жеңілісіне ұшырады.
Еске салайық, бұған дейін Ыдырыс UFC турнирінде жекпе-жек өткізген, алайда ол кезде тек промоушенмен келісімшарт алу мүмкіндігі сарапқа салынған еді. Кейін Әліби UFC ұйымымен төрт жекпе-жекке арналған келісімшартқа қол қойды.
