Екі алтын ғана ма? Қазақстан құрамасының бапкері күтпеген мәлімдеме жасады (ВИДЕО)
Бокстан Ұлан-Батырда өткен Азия чемпионатында Қазақстан әйелдер құрамасы екі алтын және бір күміс медаль жеңіп алды. Осы жетістікке қатысты құраманың бас бапкері Елдос Сайдалин өз пікірін білдірді.
“Біздің мақсат – тек алтын медаль”
Қазақстан құрамасының бас бапкері жарысқа әрдайым жоғары мақсатпен келетіндерін атап өтті.
“Біз әр жарысқа тек алтын медаль үшін барамыз. Дегенмен спорт болған соң, кейде сәтсіздіктер де кездеседі. Құдайдың қалауымен бұл жолы екі алтынмен шектелдік. Жалпы нәтиже жаман емес — қыздар барын салды. Ең бастысы, осы жарыста жинаған тәжірибе алдағы ірі додаларда үлкен көмек береді”.
Қателіктер сараланып, жұмыс жалғасады
Бапкер кейбір жекпе-жектерде кеткен кемшіліктер де назардан тыс қалмайтынын айтты. Оның сөзінше, барлық қателік талданып, алдағы уақытта түзету жұмыстары жүргізіледі.
“Әрине, толық қанағаттандық деп айту қиын. Бокста бәрі анық көрінеді — қай жерде қате кетті, қай тұста кемшілік болды. Біз бұл мәселелерді бапкерлер құрамымен бірге талқылап, жұмыс істейміз”, – деді Сайдалин.
Қазақстан боксшылары халықаралық аренада белсенді
Қазір Қазақстан әйелдер құрамасының боксшылары халықаралық жарыстарда тұрақты өнер көрсетіп жүр. Олар Түркия, Әзербайжан, Черногория секілді елдерде сынға түсуде.
Сонымен қатар тағы алты қазақстандық боксшы Бразилияда өтіп жатқан оқу-жаттығу жиыны мен жарыстарға қатысып жатыр. Жалпы алғанда қазіргі сәтте 10 боксшы халықаралық турнирлерде тәжірибе жинақтауда.
Олимпиадаға іріктеу: тек үздіктер барады
Бапкердің айтуынша, алдағы басты мақсат — Олимпиада ойындары. Сол себепті барлық боксшылар іріктеу кезеңдерінде өз деңгейін дәлелдеуі керек.
“Алдағы іріктеу жарыстарында кім үздік нәтиже көрсетсе, сол Олимпиадаға барады. Біз ең мықты спортшыларды ғана апарамыз”, – деп нақтылады бас бапкер.
Қазір ұлттық құраманың көшбасшылары Бразилиядағы оқу-жаттығу жиынына аттанды. Бұл дайындық кезеңінен кейін олар әлем кубогының кезеңінде өнер көрсетеді.