Макгрегор – Холлоуэй жекпе-жегіне билеттер 4 минут ішінде сатылып кетті
Конор Макгрегордың октагонға оралуы UFC тарихындағы жаңа рекордпен басталды.
Рекордтық көрсеткіш
UFC-дің екі салмақ дәрежесіндегі экс-чемпионы Конор Макгрегор мен Макс Холлоуэй арасындағы жекпе-жекке қызығушылық аса жоғары болды. Ұйымдастырушылар билеттердің барлығы 4 минуттың ішінде сатылғанын мәлімдеді.
Бұл көрсеткіш UFC тарихындағы ең жылдам сатылымдардың бірі ретінде тіркеліп отыр.
AS басылымының дерегінше, Лас-Вегастағы T-Mobile Arena кешенінің бірінші қатарындағы ең қымбат билет 43 мың доллардан асқан. Ал жоғарғы секторлардағы ең арзан орындар шамамен 600 доллар болған.
Қайта сату нарығында билеттердің бастапқы бағасы қазірдің өзінде 1500 доллардан басталып отыр. Бұл жанкүйерлердің Макгрегордың оралуын қаншалықты күткенін көрсетеді.
Жекпе-жек қашан өтеді?
Макгрегор мен Холлоуэй арасындағы айқас 12 шілдеге жоспарланған. Кездесу АҚШ-тың Невада штатындағы Лас-Вегас қаласында UFC 329 турнирінің басты оқиғасы болмақ.
Конор Макгрегор үшін бұл жекпе-жек аралас жекпе-жек ережелері бойынша соңғы бірнеше жылдағы алғашқы айқас болады. Ирландиялық файтер соңғы рет 2021 жылдың шілдесінде UFC 264 турнирінде октагонға шыққан.
Сол кезде Дастин Порьеге қарсы кездесуде бірінші раундта аяғынан ауыр жарақат алып, техникалық нокаутпен жеңілді.
Макгрегор кәсіби ММА-дағы мансабын 2008 жылы бастаған. Ал 2013 жылдан бері UFC ұйымында өнер көрсетіп келеді.