Кездесу 6 желтоқсан күні Санкт-Петербургте өтеді.
Қазақстандық файтер Асылжан «Сақ» Бақытжанұлы 6 желтоқсан күні Санкт-Петербургте өтетін «Наше дело 86» турнирінде жекпе-жек өткізбек.
Отандасымыздың қарсыласы 34 жастағы ресейлік аралас жекпе-жек шебері Шамиль Гамзатов болады. PFL лигасында оның екі жеңісі бар. Сондай-ақ, Гамзатов UFC-де екі жекпе-жек өткізген: бразилиялық Клидсон Абреуды жеңіп, поляк жауынгері Михал Олексейчуктан техникалық нокаутпен жеңілген.
Гамзатов соңғы рет осы жылдың маусым айында «Наше дело» турнирінде ауыр салмақтағы чемпиондық белбеу үшін Виктор Немковпен жекпе-жекке шығып, жеңілген болатын.
Ал Асылжан Бақытжанұлы (15-4) ұзақ үзілістен кейін ММА-ға қайта оралып отыр. Өткен жылдың желтоқсан айында ол ресейлік Максим Гришинге қарсы жекпе-жек өткізіп, төрешілер шешімімен жеңілген еді. Бірақ кейіннен жекпе-жек нәтижесін жарамсыз деп танылды.
