Бірақ айқастың нақты қай күнге жоспарланғаны әзірге белгісіз.
Шавкат Рахмонов пен Белал Мұхамед арасындағы чемпиондық жекпе-жек қай турнирде өтетіні белгілі болды. Бұл туралы Sports.kz хабарлады.
CBS News және Yahoo!Sports журналисі Рубен Картердің ақпары бойынша аталған айқас UFC 316 кешінде өтеді. Алайда оның қашан ұйымдастырылатыны әзірге белгісіз. Белгілісі, жекпе-жек Лас-Вегастағы T-Mobile Arena-да өтеді.
Бұған дейін Белал Мұхамед қазақстандық файтермен төбелесуге ең тиімді уақыт мамыр-маусым айлары екенін айтқан еді. Дегенмен, мамырда Канаданың Монреаль қаласында UFC 315 турнирін өткізу жоспарланған.
Еске сала кетейік, Шавкат Рахмонов пен Белал Мұхамед әу баста 2024 жылдың желтоқсанында өтуі керек-тін. Алайда америкалық файтердің күтпеген жерден сырқаттануына байланысты Шавкт ирландиялық аралас жекпе-жек шебері Иэн Гэрримен жұдырықтасты.
