Дастан Сәтпаевтың "Реал" жейдесіндегі суреті табылды
Әлеуметтік желіде шабуылшының бала кезінде мадридтік "Реалдың" жейдесін киіп түскен архивтік суреті пайда болды.
2015 жылы түсірілген сурет жарияланды
Футболшының анасы Мәдина Instagram парақшасында Дастанның бала кезіндегі ерекше фотосын көрсетті. Сурет 2015 жылы Астанада түсірілген.
Кадрдан бүгінде Қазақстан футболының ең талантты жас ойыншыларының бірі саналатын Сәтпаевты мадридтік "Реалдың" жейдесімен көруге болады. Мәдинаның айтуынша, бұл архивтік фотосуретті оған әлеуметтік желідегі оқырмандарының бірі жіберген.
"Суретті оқырманым жіберді. Астана, 2015 жыл. Осынша уақыт сақтап жүргеніне таңғалдым. Күтпеген жағдай болды", — деп жазды футболшының анасы.
Кейін мадридтік клубқа қарсы ойнады
Бір қызығы, арада он жыл өткен соң Дастан Сәтпаев әйгілі "Реал Мадридке" қарсы ресми матчта алаңға шықты.
2025 жылдың 30 қыркүйегінде "Қайрат" Чемпиондар лигасының жалпы кезеңінің екінші турында мадридтік клубты Алматыдағы Орталық стадионда қабылдаған еді. Кездесу 5:0 есебімен испаниялық команданың жеңісімен аяқталды.
Сәтпаев сол ойынды негізгі құрамда бастап, алаңда 81 минут өткізді. Кейін оның орнына басқа футболшы шықты.
Қазір "Бернли" сапында
Қазір 18 жастағы форвард Англияның "Бернли" клубында өнер көрсетеді. Ол командаға лондондық "Челсимен" ұзақмерзімді келісімшартқа отырғаннан кейін маусымдық жалға алу құқығымен қосылды.
Сәтпаевтың "Бернли" сапындағы дебюті 23 тамызда өтті. Чемпионшип аясындағы "Вест Бромвичке" қарсы сырт алаңдағы кездесуде қазақстандық футболшы 57-минутта қосалқы құрамнан алаңға шықты.