Қазақстанда жанармай бағасы рекорд жаңартты

Маусым айында АИ-92 маркалы бензиннің бағасы бір ай ішінде 4–6 теңгеге өсті. Бұл – ақпан айынан бергі ең ірі баға өсімі.

Алматыдағы баға

kolesa.kz мәліметінше, Алматы қаласындағы ірі жанармай бекеттерінде АИ-92 бензинінің бағасы 30 маусымда 215–217 теңгеге жеткен. Мамыр айының соңында бұл баға 209–212 теңге шамасында болған. Бұл өсім ақпанда жанар-жағармай нарығындағы мемлекеттік баға реттеуінің күшін жоюдан кейінгі ең жоғары көрсеткіш болып отыр.

АИ-95 маркалы бензин Алматыда бірнеше ай бойы 271–275 теңге аралығында тұрақты күйде қалса, дизель отыны маусымда біраз қымбаттап, 312–315 теңге шамасында саудалануда (мамырда — 309–311 тг).

Астана мен Шымкенттегі жағдай

Баға өсімі Астана мен Шымкентте де байқалды:

• Астанада АИ-92 — 214–217 теңге, мамырда — 209–213 теңге;
• Дизель — 311–314 теңге, яғни 2–7 теңгеге өскен;
• Шымкентте АИ-92 — 201–204 теңге, дизель — 305–307 теңге, яғни 2–4 теңге қосылған.

Министрлік не дейді?

Энергетика министрі Ерлан Ақкенженов жанармай нарығына мемлекет тек бір жағдайда ғана араласатынын айтты — егер "спекулятивтік баға секірістері" орын алса. Ал қазіргі баға өсімі нарықтық тетіктермен, яғни сұраныс пен ұсыныс арасындағы теңгеріммен түсіндірілуде.