Жуырда Meta мен Қазақстан авторлар қоғамы келісімге келді.
Қазақстандық музыкалық туындылар Meta компаниясының әлеуметтік желілеріне қайта қосылды. Бұл жаңалықты Зияткерлік меншік комитеті растады. Жарты жылға созылған келіссөздер нәтижесінде Meta мен «Қазақстан авторлар қоғамы» екіжақты келісімге қол жеткізген.
Музыка қайта оралды
Осы келісім аясында қазақстандық авторлардың музыкалары Instagram мен Facebook платформаларында заңды түрде қолданылатын болды. Бұрын қолданушылар бұл желілерде отандық музыкалық контентті пайдалану кезінде шектеулерге тап болатын. Енді бұл мәселе шешімін тауып отыр.
Келісім мерзімі – 2 жыл
Екі тарап 2 жылдық келісімшартқа қол қойып, мерзімін ұзарту мүмкіндігін де қарастырған. Қазақстандық музыканың авторлық құқықтары толық қорғалып, контентке төленетін роялти тікелей авторлар мен құқық иеленушілеріне бағытталатын болады.
Ресми пікір
Зияткерлік меншік құқығы комитетінің төрағасы Шолпан Әбдірееваның айтуынша, Meta компаниясы қазақстандық авторлар мен құқық иеленушілердің мүддесін құрметтеуге, сондай-ақ авторлық құқықты сақтауға дайын екенін ресми түрде мәлімдеген.
