Қытай төрағасы Си Цзиньпиннің Астанаға сапары аясында әлемге танымал әнші Димаш Құдайберген қазақ мәдениеті мен тіліндегі әндерге көрсетілген ерекше құрмет үшін алғыс білдірді.
Қазақстанның халық әртісі, әлемге танымал әнші Димаш Құдайберген Қытай төрағасы Си Цзиньпинге қазақ мәдениеті мен қазақ тіліндегі әндерге көрсеткен құрметі үшін ризашылығын білдірді. Бұл туралы ол CGTN телеарнасына берген сұхбатында айтты.
Димаш өзінің жастық шағында Қытай мәдениетін Джеки Чан, Брюс Ли және кунг-фу арқылы танығанын айтты. Бірақ Қытайға сапары кезінде бұл елдің қонақжайлығы мен еңбекқорлығына өзі көз жеткізген.
"Біз – Азия халықтары ретінде ұқсас тәрбиеміз бен дәстүрлеріміз бар. Үлкенге құрмет, кішіге ізет – бізді жақындастыратын құндылықтар", – деді ол.
2017 жылы Бейжіңде өткен іс-шара кезінде Димашқа Қытай төрағасының Қазақстанға келетінін хабарлаған. Сол кезде әншіден қазақ және қытай тілдерінде бір-екі ән орындау сұралған. Ол "Жасмин" атты қытай халқы үшін ерекше маңызы бар әнді шебер орындап шыққан.
"Концерттен кейін Си Цзиньпин келіп, қолымды алып, алғыс білдірді, менің Қытайдағы және әлемдегі жетістіктерімді атап өтіп, қолдау көрсетті. 'Сізге әрдайым табыс тілеймін' деді", – деп еске алды Димаш.
Си Цзиньпин мен оның отбасы Димаштың өнеріне ерекше құрметпен қарайды. Әнші мұны үлкен жауапкершілік деп санайды.
"Менің өнерім – халыққа қызмет етудің бір түрі. Сол себепті мен Си Цзиньпин мырзаның шақыруын қабыл алып, Сиань қаласындағы тамаша кешке қатыстым", – деді ол.
"Қазақ мәдениетіне және қазақша әндерге көрсеткен құрметі үшін Си Цзиньпин мырзаға шын жүректен алғысымды білдіремін. Ең бастысы – халқымыз арасындағы достық нығайып, мәңгі жалғасса екен", – деп толықтырды әнші.
Сұхбат соңында Димаш адамзаттың басты құндылығы – бейбітшілік пен бірлік екенін атап өтті.
"Мен қай елге барсам да, қай ұлтпен кездессем де, ешқашан халықты жаман деп айтпаймын. Ұлтқа бөлінбей, адамдардан жақсылық көру керек. Махаббатты таратып, бір-бірімізге қолдау көрсетейік", – деді ол.
Айта кетейік, Лондонда жанкүйерлер қоршауында қалған Димаш ресми қабылдау кешінде "The Crown" / "荆棘王冠" әнін орындады. Бұл туынды – композитор Ұлықпан Жолдасовтың "Кім екен?" атты әнінің қытай тіліндегі нұсқасы. Ән алғаш рет Димаштың 2017 жылы Астанадағы жеке концертінде шырқалған болатын.
