Алты жекпе-жек, алты нокаут: этникалық қазақ қызы АҚШ-та жеңіске жетті
Ресей атынан өнер көрсететін этникалық қазақ Альбина Молдажанова АҚШ-та өткен кәсіпқой бокс кешінде қарсыласын төртінші раундта нокаутқа түсірді.
Төртінші раундтағы жеңіс
Арлингтон қаласында Джейк Пол негізін қалаған MVP промоутерлік компаниясының ұйымдастыруымен бокс кеші өтті. Турнирде 25 жастағы Альбина Молдажанова Кристи Бэвингтонмен жұдырықтасты.
Кездесу толық қашықтыққа созылған жоқ. Төртінші раундта Молдажанова қарсыласын нокаутқа түсіріп, кәсіпқой рингтегі алтыншы жеңісіне жетті.
Молдажанова кәсіпқой бокстағы жолын 2025 жылы SmartLab Boxing ұйымымен әріптестік орнатудан бастаған. Содан бері алты кездесу өткізіп, барлығын мерзімінен бұрын аяқтады. Оның қазіргі көрсеткіші – алты жеңіс, алты нокаут және бірде-бір жеңіліс жоқ.
Әуесқой бокста да жүлде алған
Тобыл қаласында дүниеге келген боксшы кәсіпқойлар қатарына ауысқанға дейін әуесқой рингте де жетістікке жеткен. 2024 жылы Еуропа чемпионатының күміс жүлдегері атанып, 2025 жылы әлем біріншілігінде қола медаль иеленді. Сонымен қатар Ресей чемпионы атағын жеңіп алған.