Танымал блогер әрі психолог Айжұлдыз Адайбекова көпшілікті қоғамдық орындарда этиканы сақтауды ескертті.
Желіде танымалдылыққа ие Айжұлдыз Адайбекова әлеуметтік желідегі парақшасында өзінің жеке өмірінде орын алған келеңсіз жағдайды айтты. Ол көпшіліктен өзінің анасы мен баласымен бірге жүрген кезде жеке шекараны бұзбауды сұрады.
"Мен де қарапайым адаммын. Ана болу – үлкен жауапкершілік. Күнделікті өмірде шаршайтын, демалатын, көңіл-күйі әртүрлі болатын сәттер болады. Осындай сәттерде мейрамханада отырғанда немесе отбасыммен жүргенде, суретке түсуге өтініш жасалуы кейде орынсыз болатынын ескергім келеді", – деді ол.
Айжұлдыздың айтуынша, кейбір азаматтар оның ескертуіне қарамастан жасырын емес, ашық түрде видео түсіруге дейін барған.
"Үш рет бір адам келіп, біз сыпайы түрде суретке түсуден бас тарттық. Бірақ ол адам кейіннен ашық камераны қосып, баламның көзінше видеоға түсіре бастады. Бұл – әдепсіз әрекет. Балам – менің отбасымның бір бөлігі, ол да қорғауға лайық", – деді блогер.
Айжұлдыз кейбір оқырмандардың тарапынан айтылатын "сендер біздің арқамызда блогер болдыңдар" деген пікірге де тоқталды:
"Бәрі – Алланың қалауы. Адамның танымал болуы – біреудің арқасы емес. Бұл – тағдыр мен еңбек нәтижесі. Құдайдың рөлін ешкім иеленбеуі керек. Әркім әуелі өзінен бастасын: өзіне деген құрметтен, өзгеге деген сыйластықтан", – деді психолог.
Адайбекова ел арасында танымал тұлға болса да, әр адамның жеке кеңістігі мен тыныштығын сақтау маңызды екенін еске салады. Ол жанкүйерлеріне деген алғысын білдіре отырып, жеке өміріне құрметпен қарауды өтінді.
"Мен дау шығаратын немесе агрессиямен жауап беретін адам емеспін. Бірақ бұл – менің тыныштығымды бұзуға болады дегенді білдірмейді. Баршаңызға тек ізгілік тілеймін", – деп сөзін қорытты ол.
