Бокстан әлемнің экс-абсолютті чемпионы Дмитрий Бивол бір күнге "Зениттің" ойыншысы болып, Нұралы Әліппен бір командада жаттықты.
Петербордың "Зенит" клубы күтпеген жаңалықты бөлісті: бокстан суперчемпион Дмитрий Бивол команданың жаттығуына қатысып, өзін футболшы ретінде сынап көрді. Бұл бір күндік шара ресми түрде жарияланып, клубтың әлеуметтік желісінде видео және фотолармен ұсынылды.
"Әлем чемпионы және клуб жанкүйері Дмитрий Биволды футболшы ретінде сынап көруге шақырдық!", — делінген ресми мәлімдемеде.
Фотоларда Биволдың командамен бірге жаттығу сессияларына толық қатысқаны, тіпті жаңадан келген ойыншыларға арналған "туннель" дәстүріне қосылғаны көрсетілген.
"Зенит" сапында өнер көрсетіп жүрген Қазақстан құрамасының қорғаушысы Нұралы Әліп те бұл сәттің куәсі болды. Айта кетейік, бұған дейін Бивол Нұралыға өз қолтаңбасы бар қолғап сыйлаған еді. Бұл жекпе-жек әлемі мен футбол арасындағы достықтың жарқын мысалына айналды.
