Әнші сын айтқан жандарға жауап беріп, артық салмақтан арылуды тек сұлулық үшін емес, денсаулығы үшін жасағанын мәлімдеді.
Қазақстанның танымал әншісі, «Құрмет» орденінің иегері Алтынай Жорабаева артық салмақтан арылып, жаңа бейнесімен көпшілікті таңғалдырды. Әнші өзіне жиі айтылатын сындар мен жеке мақсатын ашық айтты.
Әншінің айтуынша, декреттік демалыс кезінде ол 96 келіге дейін салмақ жинаған. Соңғы жылдары қарқынды жаттығулар мен тәртіптің арқасында 37 келіден арылған.
«Алтынай қыздарыңыз 96 келіден 75 келіге түсті. Аллаға шүкір! Мақсатым – 60 келіге жету. Алла денсаулық берсін!» – деп бөлісті өнер иесі.
Жорабаеваға әлеуметтік желіде әлі күнге дейін түрлі пікір айтылады. Кейбіреулер оның «тым арықтап кеткенін» жазып, бұрынғы қалпымен салыстырады.
«Көзіңді неге олай істегенсің? Түрің өзгеріп кетіпті. Бұрынғы Алтынай әдемірек еді» деген пікірлерді жиі естимін. Бірақ, жандарым-ау, мен 50 жасқа жақындап қалдым ғой. 37 келі тастаған адаммын, әрине, терім салбырайды. Жайлап жаттығулар жасап жүрмін. Нәтижесі болады. Болмаса, мүмкін салбыраған терімді тартып тастармын. Артық салмақтың ешкімге пайдасы жоқ, денсаулыққа зиян», – деді әнші.
Жорабаева артық салмақтан арылуды тек сұлулық үшін емес, денсаулық үшін таңдағанын атап өтті. Өзіне ыңғайсыздық тудырған килолардан құтылу оның өмір сапасын арттырған.
