"Астана ЭКСПО-2017" ұлттық компаниясының бұрынғы төрағасы, экс-министр Талғат Ермегияев 9 жыл түрмеде отырса да, шартты түрде мерзімінен бұрын босау құқығын пайдаланған жоқ.
2025 жылдың наурызына дейін Ермегияев тағайындалған 14 жылдық жазаның үштен екісін өтеп қойған. Осы кезеңде ол шартты түрде босауға өтініш бере алатын еді. Бірақ Жоғарғы соттың мәліметінше, ол мұндай қадамға барған жоқ.
Жоғарғы соттың Қылмыстық істер жөніндегі сот алқасының хатшылығының меңгерушісі Ж. Мырзабаеваның айтуынша:
"2025 жылдың 1 сәуіріндегі "Төрелік" ақпараттық жүйесінің деректеріне сәйкес, сотталған Талғат Ермегияев шартты түрде босатуға байланысты ешқандай өтініш түсірмеген".
Сол сияқты Алматы облыстық соты да Ермегияевтан жазасының өтелмеген бөлігін басқа жазамен алмастыру туралы да өтініш түспегенін растады.
Ал Ішкі істер министрлігі Қылмыстық-атқару жүйесі комитеті (ҚАЖК) Ермегияевтің қазіргі уақытта сот белгілеген жазасын Алматы облысы, Заречный ауылындағы түзеу мекемесінде өтеп жатқанын хабарлады.
Алайда ҚАЖК өкілдері Ермегияевтің мінездемесі, көтермелеулері немесе денсаулық жағдайы туралы сұрақтарға жауап беруден бас тартты. Олар мұны "Жеке деректерді қорғау туралы" заң мен Қылмыстық-атқару кодексінің талаптарымен түсіндірді.
Талғат Ермегияев 2016 жылы аса ірі көлемде пара алу және сеніп тапсырылған мүлікті иемдену немесе ысырап ету баптары бойынша кінәлі деп танылып, 14 жылға қатаң режимдегі колонияға қамалған. Сонымен қатар сот оның бүкіл мүлкін тәркілеуге шешім шығарған.
2018 жылы Ермегияев жазасын өтеген ЕЦ-166/10 мекемесінің бұрынғы басшылығы да сотқа тартылып, экс-шенеунікке арнайы жеңілдіктер жасағаны үшін айыпталған. Осыдан кейін мекеме қатаң режимнен қоныс-колония түріне ауыстырылып, сотталғандар басқа түрмелерге ауыстырылған.
2022 жылдың наурыз айында әлеуметтік желіде Ермегияевтің колония ішінде спортпен шұғылданып жатқан видеосы тарап кеткен. Видеода ол бірнеше адаммен бірге бокс техникасын жаттықтырып жатқаны көрінеді. Бұл видео 2019 жылы түсірілген болуы мүмкін, ал 2021 жылдың наурызында жүргізілген тінту кезінде спорттық жабдықтар тәркіленген.
