Қазақстан ұлттық құрамасының ойыншысы және Түркияның «Бешикташ» клубының жартылай қорғаушысы Бақтиер Зайнутдиновтың футболдағы болашағы бұлыңғыр. Бұл туралы Спорт жайлы телеграм-арнасы түркиялық БАҚ өкілдеріне сілтеме жасап хабарлады. Жерлесіміз жарақатына байланысты соңғы 2,5 айда алаңға шыққан жоқ, деп жазады түрік журналисі Серкан Дикме.
Серкан Дикменің айтуынша, Бақтиердің жарақаты оңай жазыла салатын жарақат емес. Қазіргі таңда сіңір аймағында ісіну бары анықталған. Жақын күндері толық медициналық тексеруден өтіп, жарақаттың нақты сипаты мен қалпына келу мерзімі белгілі болады.
Алайда журналист футболшының мансабына қауіп төндіретін факторлар бар екенін де жасырмайды. Бұл ақпарат жанкүйерлер мен сарапшылар арасында алаңдаушылық туғызды.
Бақтиер Зайнутдинов – Қазақстан ұлттық құрамасының үздік ойыншыларының бірі. Ол бұған дейін Ресейдің ЦСКА командасында ойнап, 2023 жылы Түркияның грандтарының бірі «Бешикташқа» ауысқан еді. Оның еңбекқорлығы мен әмбебап ойыны командаларында жоғары бағаланған.
