Ойыншылар арасындағы кикілжіңге нақты не себеп болғаны белгісіз.
Мадридтік "Реалдың" жаттығу жиынында оқыс оқиға болды. Испан журналисі Эду Агирренің мәліметінше, команда сапындағы Джуд Беллингем мен Антонио Рюдигер жұма күні өткен жаттығу барысында бір-біріне қол көтеруге дейін барған.
Қақтығыс спорттық сәтсіздікке немесе эмоцияға байланысты туындағаны нақты айтылмаған. Дегенмен, Агирренің хабарлауынша, жағдай ушығып кетпей тұрып, оқиға орнына басқа ойыншылар жетіп, екі футболшыны ажыратып алған.
Еске салайық, мадридтік клуб ертең Лондонның "Арсеналына" қарсы шешуші матч өткізеді. Беллингем мен Рюдигер сынды негізгі ойыншылар арасындағы түсініспеушілік команданың дайындығына кері әсерін тигізбесе игі.
Чемпиондар лигасының ширек финалы аясындағы алғашқы ойында лондондық команда корольдік клубты 3:0 есебімен тізе бүктірген еді.
