Өзбек жұлдызы наурыздан бері манчестерлік клубтың құрамына іліне алмай жүр.
Соңғы апталарда АПЛ клубының сапында көрінбей кеткен өзбек қорғаушысының болашағы қыл үстінде тұр. «Манчестер Сити» Хусановты жалға беруге дайын.
21 жастағы Абдуқодир Хусанов 2024 жылдың қаңтарында «Ланс» клубынан «Манчестер Ситиге» 40 миллион еуроға (бонуспен бірге 50 миллион еуроға дейін) ауысып, Орталық Азия тарихындағы ең қымбат футболшы атанған болатын. Алайда наурыздан бері қорғаушы негізгі құрамға енбей келеді.
Хусанов соңғы рет 30 наурызда Англия Кубогы аясында «Борнмутқа» қарсы кездесуде алаңға шығып, үзілісте ауыстырылған. Одан кейінгі матчтарда мүлдем құрамға ілінген жоқ. Бұған дейін ол Премьер-лигада, Кубок пен Чемпиондар лигасында 9 ойын өткізіп, бір голмен көзге түскен.
Fichajes.net дерегінше, клуб басшылығы мен бас бапкер Пеп Гвардиола өзбек футболшысын Еуропаның басқа командасына уақытша жалға беруді қарастырып жатыр.
«Оның әлеуеті жоғары. Бірақ тұрақты ойын тәжірибесі қажет. Аренда – мансап жолын дамытуға үлкен мүмкіндік», — деп жазады испан басылымы.
Гвардиола Хусановқа сенетінін айтқанымен, дәл қазір негізгі құрамға бәсеке тым жоғары екенін ескере отырып, оны тәжірибе жинау үшін басқа клубқа жіберуді қолдайды.
Абдуқодир Хусановқа Англиядан бөлек, Испания, Германия және Италия клубтары да қызығушылық танытуда. Испаниялық сарапшы Начо Эстрелла бұл шешімнің футболшының ұзақмерзімді мансабы үшін маңызын атап өтті:
«Жалға беру арқылы ол өз деңгейін дәлелдеп, болашақта «Ситиге» нағыз мықты қорғаушы ретінде оралуы мүмкін», — деді сарапшы.
