Талдықорғандық "Жетісу" ФК бас бапкері Самат Смақов командасының жаттығу сәтінде белсенділік танытып, алаңға оралды.
Бұған дейін Самат Смақов төрешілерге қатысты өткір мәлімдемелері үшін Қазақстан футбол федерациясы тарапынан тәртіптік жазаға тартылған болатын. Осыған байланысты бірнеше матчта алаң жиегінде болмаған бапкер, ақыры жаттығу үдерісіне қайта қосылды.
Смақовтың болмауына қарамастан "Жетісу" сырт алаңда "Тұранмен" тең ойнап, жеңілістер сериясын тоқтатты. Бұл нәтижеден кейін команда келесі турға дайындықты жоғары көңіл-күймен бастады.
Жарияланған видеода Самат Смақов алаңға шығып, ойыншылармен бірге жаттығу жасайды. Ол ұзын әрі өткір пастар беріп, "квадрат" жаттығуына қатысып, футболшыларға шеберлік көрсетуде. Командада жақсы атмосфера мен өзара қолдау байқалады.
"Команда бапкердің оралуын жылы қабылдады. Жаттығу кезіндегі белсенділік пен өзара сенім – алдағы турға дайындықтың сапасын арттырды", — делінген репортажда.
Қазір "Жетісу" Қазақстан Премьер-лигасының жетінші турынан кейін небәрі 4 ұпаймен турнирлік кестеде 12-орында тұр. Команда осы уақытқа дейін бірде-бір жеңіске жетпеген: 4 тең ойын, 3 жеңіліс тіркелген.
