Павлодардыі "Ертіс" футбол клубы бас бапкер қызметіне жаңа маман іздеуде. Клуб 35 жастағы қазақстандық маман Ринат Алүетовпен байланысқа шыққан.
Инсайдерлік ақпаратқа сәйкес, Ринат Алүетов жақын арада "Ертісті" тізгіндеуі мүмкін. Ол бапкерлік мансабын "Жетісу Б" командасынан бастаған. Кейін негізгі команда — "Жетісу" тізгінін қолына алып, сол кезде Қазақстан Премьер-Лигасындағы ең жас бас бапкер атанды.
Алүетов кейін "Тұран", "Жеңіс", "Елімай" клубтарын жаттықтырды. Соңғы жұмыс орны — Ақтаудың "Каспий" командасы болды. Алайда 2023 жылдың соңынан бері ол жұмыссыз жүр.
Қазір "Ертіс" Қазақстан Бірінші лигасының турнирлік кестесінде 18 ұпаймен екінші орында тұр. Маусым басында команда Қайрат Нұрдәулетовтің басшылығымен бірқатар сәтті ойындар өткізгенімен бапкер күтпеген жерден клубтан кеткен болатын. Осыдан кейін басшылық жаңа стратег іздей бастады.
Айта кету керек, "Ертіс" — Қазақстан чемпионатын бес рет жеңіп алған тарихи клуб. Команда 1990-2000 жылдары ел футболының флагманы болған. Енді клубтың басты мақсаты — Премьер-Лигаға қайта оралу.
