Клубтық әлем чемпионатындағы C тобының 2-турында "Бавария" аргентиналық "Бока Хуниорсқа" қарсы шықты. Аса тартысты матчта мюнхендіктер жеңісті соңғы минутта жұлып алды.
Ойынның 18-минутында ағылшын шабуылшысы Харри Кейн өзінің шеберлігін паш етіп, есеп ашты. Алайда оңтүстік америкалық клуб та қарап қалмады. 66-минутта уругвайлық Мигель Мерентьель таразы басын теңестірді.
“Бока” сенсация жасауға жақын тұрғандай еді. Бірақ 84-минутта Франция құрамасының жартылай қорғаушысы Майкл Олисе жағдайды өзгертті. Оның голы матчтың тағдырын шешіп, “Баварияға” үш ұпай алып келді.
“Бізге мұндай матчтар үлкен тәжірибе береді. Қарсылас мықты болды. Бірақ біз соңына дейін күрестік”, — деді Майкл Олисе матч соңында берген сұхбатында.
Осы жеңістен кейін “Бавария” 6 ұпаймен C тобында бірінші орынға қайта оралды. Екінші орында “Бенфика” орналасқан. Португалиялық клубтың еншісінде 4 ұпай. Ал “Бока Хуниорс” бір ұпаймен үшінші орында тұр. Топтың аутсайдері ретінде жаңа зеландиялық “Окленд Сити” екі ойында да ірі есеппен жеңіліп, әзірге ұпай жинай алмады.
