Жаңа Зеландиялық "Окленд Сити" командасының тарихында ең үлкен оқиғалардың бірі болды. Олар клубтар арасындағы әлем чемпионатында ұпай еншіледі. Ал голдың авторы – қарапайым ұстаз.
Клубтық әлем чемпионатында “Окленд Сити” командасы күтпеген жерден аргентиналық алып “Бока Хуниорспен” тең түсті – 1:1.
Матчтың басты кейіпкері 28 жастағы орталық қорғаушы Кристиан Грэй болды. Ол бұрыштамадан кейін баспен допты торға тоғытты. Бұл гол “Оклендке” ұпай ғана емес, FIFA тарапынан $1 млн көлемінде сыйақы да алып келді.
Грэйдің голынан кейін аргентиналықтар барын салды: 40 соққы жасап, 2,39 xG жинады. Бірақ өз күшімен гол соға алмады. Олардың жалғыз добы – автогол болатын. Ал “Окленд” соңына дейін қорғанып, тарихи ұпайға қол жеткізді.
Айта кету керек, бұл тең ойын жартылай әуесқой команданың алғашқы екі турда 0:16 есебімен ұтылғанынан кейін үлкен сенсация болды.
Кристиан Грэй – мұғалім. Ол бірнеше мектепте дене шынықтыру пәнінен сабақ береді. Қазір стажер ретінде жұмыс істейді және матчқа қатысу үшін еңбек демалысына шыққан.
Грэй – “Окленд” академиясының түлегі. 2022 жылы командаға қайта оралды. Бұған дейін “Веллингтон”, “Биркенхед” пен “Уаитакере” клубтарында ойнаған. Ол – “Ливерпульдің” жанкүйері.
Матч барысында қызық жағдай болды: Кристианның голынан кейін найзағай мен дауылдың салдарынан матч тоқтатылды. 55-минутта командалар 40 минут үзіліс жасауға мәжбүр болды. Алайда үзілістен кейінгі басты кейіпкер – қақпашы Нейтан Гарроу болды.
Бірінші таймда автогол авторы атанған Гарроу кейін сегіз сэйв жасап, командасын тең есеппен аман алып қалды. Ол да футболдан тыс уақытта студент.
Матчтың үздік ойыншысы атанған Грэй DAZN арнасына берген сұхбатында:
“Мен бақыттымын. Біз бұл нәтижеге лайықпыз. Біз үшін бұл – үлкен жетістік. Мен кішкентай қаладан шыққанмын, әрқайсымыз осы жолға үлкен еңбекпен жеттік. Ең бастысы – біз бақыттымыз”, – деді.
Сондай-ақ, мұғалімдік жұмысын жалғастыратынын айтып, әзілмен:
“Жақсы болды, енді мектеп каникулы басталады”, – деп күлді.
Тең есеп «Окленд» клубына FIFA тарапынан $1 млн сыйақы алып келді. Сонымен қатар турнирге қатысқаны үшін жалпы $4,6 млн табыс түсті – бұл клубтың келесі 7 жылдық бюджетіне тең.
