«Байдалы» мен «Тоқболат» командалары арасындағы кездесудің 16-минутында алаңдағы жанжал ушығып, бір ойыншы қаптал төрешісіне шабуыл жасаған.
Шымкентте әуесқой футбол лигасының кезекті ойыны төбелеспен аяқталып, матч соңына дейін жалғасқан жоқ.
Әлеуметтік желіде тараған бейнежазбада «Байдалы» мен «Тоқболат» командалары арасындағы кездесудің 16-минутында алаң шетінде жанжал басталғаны анық көрінеді. «Байдалы» командасының бір ойыншысы қапталдағы төрешіге шабуыл жасап, күрес әдісімен жерге құлатып, соққы жасай бастаған.
Оған бірнеше командаластары мен сырттағы белгісіз адамдар қосылып, жағдай ушығып кеткен. Төрешілер матчты тоқтатуға мәжбүр болды.
Шымкент футбол федерациясы оқиғадан хабардар екенін мәлімдеп, барлық қажетті ақпарат жиналып жатқанын жеткізді. Ұйым өкілдерінің айтуынша, жағдай толық бақылауда, ал кінәлілер тәртіптік регламентке сәйкес қатаң жазаланатын болады.
Футбол – әділ бәсекеге, құрмет пен тәртіпке негізделген спорт. Шымкенттегі бұл оқиға Fair Play қағидатына қайшы келіп, әуесқой футболдың имиджіне нұқсан келтірді. Федерацияның шешімі алдағы күндері жарияланбақ.
