Қазақстан құрамасының бұрынғы бас бапкері Станислав Черчесов Лига ұлттарындағы басты мақсаты ұпай жинау емес, жаңа команда құру болғанын айтты.
Қазір Грозныйдың «Ахмат» клубын жаттықтырып жүрген маман «Спорт-Экспресс» басылымына берген сұхбатында өз қызметінен кетуіне өкінбейтінін түсіндірді. Бұл — оның бапкерлік мансабында алғаш рет команда нәтижесін жақсарта алмаған жағдай болған.
Черчесов өзінің кетуі аяқталмаған жоба болғанын атап өтті:
«Мазалайтын жағдай тек жобаны бастап, соңына дейін жеткізіп, жоспарлағаныңа қол жеткізе алмаған кезде болады. Ал сен қайда бара жатқаныңды, қандай жағдай бар екенін, не істей алатыныңды нақты түсініп тұрғанда, бірақ сені жолда тоқтатса — бұл мүлде басқа әңгіме».
Ол Лига ұлттарындағы мүмкіндіктерді шынайы бағалағанын айтты, себебі Қазақстан Норвегия (Холандпен), Австрия және Словения сынды мықты құрамалармен бір топта болған.
Черчесовтың айтуынша, Лига ұлттарындағы мақсаты қысқа мерзімді нәтиже емес, стратегиялық болған:
«Лига ұлттары жаңа команданы іріктеу кезеңдеріне дайындау үшін керек. Ұпай үшін жанталасу емес, команда қаңқасын қалыптастыру үшін... Біз жігіттерді дайындадық, жаңа ойыншыларды сынадық, жүйені өзгерттік, төрт қорғаушымен ойнауға көштік, іргетасын қаладық».
Ол кету шешімінің саналы түрде қабылданғанын айтты:
«Неліктен мен өкінуім керек? Өкінуі тиіс — шешім қабылдаған адам. Мен жұмысымды адал атқардым. Әрқашан не істеп жатқанымды және не үшін істеп жатқанымды ашық айттым — басшылығым мұны білді. Біз таңдалған бағытпен, ойланып, тұрақты жүрдік,» – деді Черчесов.
