«Алтын доптың» екі дүркін иегері, ағылшын футболының танымал өкілі Кевин Киганға қатерлі ісік диагнозы қойылды.
Бұл ақпарат Кевин Киган бұрын өнер көрсеткен «Ньюкасл Юнайтед» клубының ресми сайтында жарияланды.
Клубтың хабарлауынша, Киган іш қуысы аумағындағы ұзақ уақыт бойы мазалаған ауырсынуға байланысты ауруханаға түскен. Жүргізілген қосымша медициналық тексерулер барысында дәрігерлер одан қатерлі ісік анықтаған.
Қазіргі уақытта 74 жастағы футбол ардагері ем қабылдауды бастап кеткен. Ол өзіне көрсетілген жедел медициналық көмек пен күтім үшін дәрігерлерге алғыс білдірген. Ал Киганның отбасы бұл қиын сәтте жеке өмірге құрметпен қарауды өтініп, қосымша пікір беруден бас тартты.
Айта кетейік, Кевин Киган Германияның «Гамбург» клубында ойнаған кезеңінде 1978 және 1979 жылдары қатарынан «Алтын допты» жеңіп алған. Ол – бұл марапатты екі рет иеленген ағылшын футболындағы жалғыз ойыншы.
Футболшы ретінде Киган «Ньюкасл», «Ливерпуль», «Сканторп Юнайтед», «Саутгемптон» және Австралияның «Блэктаун Сити» клубтарының намысын қорғады. «Ливерпуль» сапында ол Англия чемпионатын үш рет, Англия Суперкубогын екі мәрте, сондай-ақ Англия кубогы, Чемпиондар кубогы мен УЕФА кубогын жеңіп алды. Ал «Гамбургпен» бірге Германия чемпионы атанып, ел кубогын олжалады.
Бапкерлік қызметінде Кевин Киган «Ньюкасл», «Фулхэм», сондай-ақ Англия ұлттық құрамасында жұмыс істеді.
