Қазақстан соккадан Еуро-2026 финалында Испанияға соңғы минуттарда есе жіберді (ВИДЕО)
Қазақстан құрамасы Тиранада шағын футболдан Еуро-2026 финалында Испаниядан 1:2 есебімен жеңілді.
Испанияға жол берді
Финалдық бәсеке өте шиеленісті өрбіді. Испания 29-минутта бұрыштама добынан кейін есеп ашты. Бірақ қазақстандықтар тез ес жиып, 35-минутта таразы басын теңестірді. Голды Үсенов соқты.
Матч тағдыры соңғы минуттарда шешілді. 39-минутта испаниялықтар тағы бір бұрыштамадан кейін гол соғып, жеңісті жұлып әкетті. Осылайша Қазақстан құрамасы Еуро-2026 турнирінің күміс жүлдегері атанды.
Қазақстан финалға қалай жетті?
Қазақстан құрамасы плей-офф кезеңінде өте сенімді өнер көрсетті. 1/8 финалда Германияны 4:0 есебімен ойсырата жеңсе, ширек финалда Польшадан 1:0 есебімен басым түсті. Ал жартылай финалда Венгрияны 2:0 есебімен ұтты.
Испания құрамасы да финалға оңай жеткен жоқ. Олар Италияны буллиттер сериясында жеңді — негізгі уақыт 2:2, буллиттер бойынша 2:0. Кейін Украинамен 1:1 есебімен тең түсіп, тағы да буллиттерде 1:0 нәтижесімен алға шықты. Жартылай финалда Сербияны 1:0 есебімен ұтты.
Сокка дегеніміз не?
Сокка — футболдың 6×6 форматындағы түрі. Ойын 50×30 метрлік алаңда өтеді. Әр матч екі таймнан тұрады, әр тайм 20 минутқа созылады. Команда құрамында бір қақпашы және бес алаң ойыншысы болады.