Қазақстандық футболшы "Леванте" сапында гол соқты (ВИДЕО)
Қазақстан жасөспірімдер құрамасының шабуылшысы Алдияр Нұрғали Испаниядағы жолдастық кездесуде мергендігімен көзге түсті.
"Теруэль" қақпасын дәл көздеді
"Леванте" клубының екінші командасы маусым алдындағы жолдастық матчта "Теруэльмен" кездесті. Қазақстандық шабуылшы Алдияр Нұрғали ойынның 20-минутында есеп ашты. Ол сол қапталда допты қабылдап, қарсылас қақпасына жақындай түсті де, оң аяғымен төменгі жақын бұрышты дәл көздеді.
Жас футболшының әдемі голы кездесудегі "Леванте" командасының жалғыз нәтижелі соққысы болды.
Нұрғалидың голына қарамастан испаниялық команда қарсыласынан 1:2 есебімен жеңіліп қалды.
Өткен маусымда сегіз гол соқты
Алдияр Нұрғали өткен маусымда "Левантенің" 19 жасқа дейінгі командасында өнер көрсетті. Шабуылшы маусым барысында сегіз рет гол соғып, клубтағы нәтижелі ойыншылардың бірі болды.
Бұған дейін Нұрғали "Асеро" командасына қарсы кездесуде де қарсылас қақпасын дәл көздеген еді.