Дастан Сәтпаев "Челсиден" жалға кетуі мүмкін футболшылар тізіміне енді
Мұндай пікірді лондондық клубтың жанкүйері әрі британиялық журналист Уилл Рейнер білдірді.
Сәтпаевқа қатысты "жалға беру" нұсқасы ұсынылды
Әлеуметтік желі қолданушыларының бірі Уилл Рейнерден трансферлік терезе жабылғанға дейін "Челси" кіммен қоштасуы керек екенін сұрады.
Журналист өз жауабында лондондық клуб сатуы немесе уақытша басқа командаға жіберуі қажет деп есептейтін футболшылардың тізімін жариялады. Сол тізімге Дастан Сәтпаев та енген.
Рейнер жас шабуылшының аты-жөнінің тұсына "жалға беру" деген нұсқаны көрсеткен. Бұл — журналистің жеке пікірі, ал "Челси" тарапынан Сәтпаевтың болашағына қатысты әзірге ресми мәлімдеме жасалған жоқ.
Сәтпаев қашан ресми түрде "Челси" ойыншысы атанады?
Дастан Сәтпаев 18 жасқа толғаннан кейін 12 тамызда ресми түрде "көктердің" футболшысы атанады.
Қазақстандық шабуылшы қазірдің өзінде лондондық клубтың қарамағында жүр. Команданың маусым алдындағы дайындығына қатысып, жолдастық кездесулерде өзін көрсетуге мүмкіндік алды.
Жас футболшыны жалға беру оған тұрақты ойын тәжірибесін жинауға мүмкіндік береді. Әсіресе Еуропа футболына енді бейімделіп жатқан ойыншы үшін басқа клубта жиі алаңға шығу маңызды болуы ықтимал.