"Астана" "Ордабасыға" қарсы негізгі құрамын шығармақ
Елордалық клуб Қазақстан Премьер-лигасының 26-турында "Ордабасыға" қарсы маңызды матчқа негізгі құрамын апарады.
"Астана" резервпен ойнайды деген ақпарат тараған
Шымкентте өтетін кездесу қарсаңында әлеуметтік желілерде "Астана" бұл матчқа қосалқы немесе резервтік құрамын шығарады деген ақпарат кең тарады. Алғашында мұндай болжам негізгі құрам футболшыларының жалақы бойынша берешекке байланысты алаңға шығудан бас тартуы мүмкін деген әңгімелермен байланыстырылған. Бірақ кейінгі мәлімет бойынша елордалық команда "Ордабасыға" қарсы негізгі ойыншыларымен өнер көрсетеді, деп жазады ASnews.kz.
Спорт блогері Рымбек Ізғали де алдағы ойын төңірегінде пікір білдіріп, кездесуге қатысты күмәнін жария түрде жеткізді. Ол екі клуб арасында бұған дейін де нәтижеге әсер етуі мүмкін күмәнді ротациялар болғанын мысалға келтірді. Атап айтқанда, блогер 2022 жылғы жағдайды еске салды.
Сол маусымда "Ордабасы" чемпионат матчында негізгі футболшыларының бірқатарын алаңға шығармай, "Астанаға" 0:6 есебімен жеңілген. Кейін Қазақстан кубогындағы кездесуде елордалық клуб резервтік құрамын шығарған, ал шымкенттіктер финалға өткен.
Ізғалидің пікірінше, 2023 жылы да құрамды күтпеген жерден өзгертуге байланысты ұқсас жағдай болған.
Айта кету керек, бұл – блогердің жеке пікірі мен болжамы. Матчтың алдын ала келісілгенін немесе нәтижеге қандай да бір сыртқы ықпал болғанын дәлелдейтін ресми ақпарат жарияланған жоқ.
"Астана" "Қайратпен" де ойнайды
Кездесу айналасындағы талқылауға күнтізбе де қосымша себеп болып отыр. "Астана" Шымкенттегі ойыннан кейін Алматының "Қайратын" қабылдайды. Сондықтан кей сарапшылар елордалық клуб негізгі ойыншыларын алдағы екі маңызды кездесуге қалай бөлетініне назар аударған.
Дегенмен "Ордабасыға" қарсы матчтың турнирлік маңызы да өте жоғары.
Маусымның аяқталуына алты тур қалғанда Қазақстан Премьер-лигасының турнир кестесін "Қайрат" 57 ұпаймен бастап тұр. "Ордабасы" 55 ұпай жинап, алматылық клубтан небәрі екі ұпайға қалып келеді.
Сонымен қатар чемпиондық жарыста "Қайраттың" күнтізбесі салыстырмалы түрде тиімдірек. Қалған алты ойынның төртеуін алматылықтар өз алаңында өткізеді. Ал "Ордабасы" осы кезеңде тек екі рет үйде ойнайды.
Сондықтан "Ордабасы" мен "Астана" арасындағы 26-тур кездесуі чемпиондық жарысқа тікелей әсер етуі мүмкін.