Футболдан Түркия Суперлигасының 18-турында "Бешікташ" сырт алаңда "Ризеспор" командасымен кездесті.
Матч 1:1 есебімен аяқталды. 38-ші минутта алаң қожайындары "Бешікташ" жартылай қорғаушысы Жедсон Фернандештың автоголы арқасында алға шықты. Бірақ ыстамбұлдық клуб үзіліске санаулы секундтар қалғанда таразы басын теңестіріп кетті. Эрнест Мучи мергендік танытты.
Бахтиёр Зайнутдинов "Бешікташтың" негізгі құрамда шығып, кездесу соңына дейін ойнады.
Ыстамбұлдық ұжым төрт матч бойы (үшеуі чемпионатта, біреуі Лига Европада) жеңіске жете алмай жүр. Ал Зайнутдинов биылғы маусымда үшінші ойында алаңға шықты.
"Бешікташ" Түркия Суперлигасында он жеті ойыннан кейін 27 ұпай жинап, турнирлік кестеде бесінші орында тұрақтады.
