"Милан" жарыстан шығып, "Бавария" соңғы минуттарда аман қалды (ВИДЕО)

"Милан" жарыстан шығып қалды

Италиялық "Милан" өз алаңында нидерландтық "Фейеноордпен" 1:1 есебімен тең түсті. Қонақтар сапынан алғашқы минутта Сантьяго Хименес есеп ашса, 73-минутта Хулиан Карранса таразы басын теңестірді. Кездесу барысында "Миланның" қорғаушысы Тео Эрнандес (51-минутта), ал "Фейеноордтың" ойыншысы Дживайро Рид (90+7-минутта) қызыл қағаз алды. Қос матчтың қорытындысы бойынша роттердамдық команда 2:1 есебімен жеңіске жетіп, 1/8 финалға жолдама алды.

"Бавария" соңғы секундтарда жеңілістен құтылды

"Бавария" шотландиялық "Селтикке" қарсы ойында соңғы минутта тең нәтиже тіркеді. Мюнхендіктер үшін 1:1 есебін 90+4-минутта Альфонсо Дэвис сақтап қалды. "Селтик" сапынан жалғыз голдың авторы — Николас-Геррит Кюн (63-минут). Екі кездесудің жиынтық есебі бойынша "Бавария" 3:2 есебімен жеңіске жетіп, келесі кезеңге өтті.

1/8 финалға шыққан басқа клубтар

Қосымша іріктеу ойындарының нәтижесінде португалиялық "Бенфика" және бельгиялық "Брюгге" өз қарсыластарын жарыстан шығарды. "Бенфика" франциялық "Монаконы", ал "Брюгге" италиялық "Аталантаны" плей-офф кезеңінен ығыстырды.

18 ақпандағы толық нәтижелер:

• "Милан" (Италия) — "Фейеноорд" (Нидерланд). 1:1 (Жиынтық есеп: 1:2)
• "Бавария" (Германия) — "Селтик" (Шотландия). 1:1 (Жиынтық есеп: 3:2)
• "Аталанта" (Италия) — "Брюгге" (Бельгия). 1:3 (Жиынтық есеп: 2:5)
• "Бенфика" (Португалия) — "Монако" (Франция). 3:3 (Жиынтық есеп: 4:3)

1/8 финалға өтетін қалған төрт команда 19 ақпандағы матчтардың нәтижесі бойынша анықталады.