Футболдан Қазақстан ұлттық құрамасының бас бапкерінің міндетін атқарушы Әли Әлиев ҚФФ-ке берген сұхбатында қай клубтардың ойыншылары ұлттық команданы күшейте алатынын айтты.
— Бас бапкер ретінде қай командалар сіздің назарыңызда?
— Біз үшін “Ордабасы” ерекше қызықты. Олар құрамын толық жаңартып, бапкерлік штаб құрылымын өзгертті. Бұл команда өте икемді тактикалық жүйеде ойнайды, ал оның нәтижелілігін ресми ойындар көрсетеді. Жаттығу матчтары мен ресми кездесулердің айырмашылығы зор. Соңғысында ойыншылар мен бапкерлерге қысым әлдеқайда жоғары, өйткені әрбір үш ұпай үшін шұғыл шешім қабылдау қажет.
Сондай-ақ “Елімайды” да мұқият бақылау керек. Олар жоғары деңгейлі, тәжірибелі ойыншыларды қатарға қосты. “Ақтөбе” де назарымызда — бұл команда Суперкубок ойынында барлық әлеуетін толық көрсете алмады. Олардың жаңа ойыншылары да сапалы футболшылар, бірақ бейімделу үшін біраз уақыт қажет.
Жалпы ұлттық құраманың бапкерлік штабы ретінде біз қазақстандық футболшыларға, әсіресе құрамында жергілікті ойыншылар саны аз клубтарға көбірек көңіл бөлеміз. Әрбір ойыншы бақылауымызда болады.
Біз әр команданың физикалық дайындық жаттықтырушыларымен байланыста боламыз. Біз үшін ойыншы қай клубта ойнайтыны маңызды емес: “Астана, “Ұлытау” немесе “Қайсар” болсын, бастысы – оның қазақстандық паспорты мен әлеуеті.
Біз бірнеше іріктеу жиындарын өткізіп, назар аударуға тұрарлық ойыншыларды анықтадық. Жоғары деңгейлі клубта ойнамаса да, егер ойыншы ұлттық құраманың назарында екенін сезінсе, бұл оған үлкен мотивация береді. Бұл тек сандық іріктеу емес, сапалық таңдауға негізделген процесс.
— Кейбір клубтар қазақстандық ойыншыларға басымдық беруде. Бұл үрдіс жайлы не ойлайсыз?
— “Қайсар” мен “Оқжетпес” толық жергілікті футболшыларға сенім артып отыр. Бұл бағыт көптеген жанкүйерлерге ұнайды.
Мен Виктор Кумыковпен сөйлесіп, оның пікірін бөлістім. Ол қазір бұл клубтардағы ойыншылардың ұлттық құраманы күшейту үшін әлі де өсуі қажет екенін атап өтті. Дегенмен, біз бұрыннан білетін Айбол Әбікен, Айбар Жақсылықов, Думан Нарзылдаев сияқты ойыншыларға назар аудару керек.
Біз әрдайым клуб бапкерлерімен байланыста боламыз. Егер белгілі бір ойыншы ұсынылса, біз оның техникалық-тактикалық әрекеттерін, физикалық көрсеткіштерін және ойын барысындағы қозғалысын қадағалаймыз.
“Қайсар” мен “Оқжетпестің” бұл жолды таңдағаны біз үшін жағымды жаңалық. Алайда, олардан тек осындай саясатты жүргізу ғана емес, нақты нәтижеге қол жеткізу де талап етіледі. Егер “Қайсар” бұл стратегиясын сәтті жүзеге асырса, бұл басқа клубтарға да үлгі болуы мүмкін.
