Жанкүйерлер шайбаға таласып қалған.
Астанада өткен "Барыс" — "Адмирал" матчы алдында трибунада күтпеген жағдай болды. Атап айтқанда, ойынға дейінгі жаттығу кезінде лақтырылған шайбаға қатысты жанкүйерлер арасында жанжал туды.
"Барыс" ойыншысы Тайс Томпсон трибунадағы жанкүйер қызға шайба лақтырған. Белгілі болғандай, ол алдын ала Джейк Массимен келісіп, жаттығу кезінде сувенир алуды жоспарлаған.
Алайда сол сәтте белгісіз ер адам шайбаны тартып алған. Кейін тағы бір шайбаны да иемденуге тырысқан.
Жанжал салдарынан қыз бен оның жанындағы адам баспалдақтан құлап, жарақат алды. Оқиға трибунадағы басқа көрермендердің де алаңдаушылығын тудырды.
Куәгерлердің айтуынша, тәртіп бұзған ер адам мас күйде болған.
Оқыс оқиғаға полиция қызметкерлері араласып, күдікті арена аумағынан шығарылды. Кейін ол 15 тәулікке қамауға алынды.
Клуб өкілдері кейінірек бұл жағдайдың жақсы аяқталғанын хабарлады.
"Барыс" клубы жанкүйер қызды тауып, оған армандаған шайбаны Тайс Томпсон арқылы табыстады.
