Шымкенттегі Қажымұқан Мұңайтпасов атындағы орталық стадионда футбол ойнап жүрген 11 жастағы балаға садақ оғы тиіп, ауруханаға жеткізілді. Полиция оқиғаға байланысты қылмыстық іс қозғады.
Куәгерлердің айтуынша, сенбі күні күндіз орталық стадион алаңында мүгедектігі бар спортшыларға арналған садақ ату жаттығуы өтіп жатқан. Сол сәтте оқ ұшу бағытын өзгертіп, жақын маңда футбол ойнап жүрген баланың арқасына тиіп кеткен.
Шымкент қалалық денсаулық сақтау басқармасы зардап шеккен бала туралы былай деп хабарлады:
“Клиникалық хаттамаға сай барлық қажетті тексерулер жүргізілді. Қазір баланың жағдайы – орташа ауыр, бірақ тұрақты. Ол хирургиялық бөлімде ем алып жатыр”, – делінген ресми мәлімдемеде.
Қалалық полиция департаменті оқиға фактісін растады. Ведомство мәліметінше оқ атудың траекториясы бұзылып, жасөспірімге зақым келтірген. Қазір баланың өміріне ешқандай қауіп төніп тұрған жоқ.
“Аталған факт бойынша ҚР Қылмыстық кодексіне сәйкес қылмыстық іс қозғалып, алдын ала тергеу амалдары жүргізілуде”, – деді полиция өкілдері.
Бұл оқиға Шымкенттегі спорттық және қоғамдық нысандардағы қауіпсіздік деңгейіне байланысты алаңдаушылықты күшейтті. Еске сала кетейік, осы көктемде қалада 7 жасар бала ашық жатқан орға құлап қаза тапқан болатын. Ол жағдайдан кейін тұрғындар құрылысшылар мен жауапты мекемелерді жауапкершілікке тартуды талап еткен.
