NBA финалының ең драмалық сәті Оклахомада өтті. "Индиана Пэйсерс" жұлдызы Тайриз Халибертон 7-ші ойынның алғашқы ширегінде ауыр жарақат алып, кездесуді жалғастыра алмады.
Финалдық серияның шешуші ойынында Тайриз Халибертон алаңда ойыны жүріп тұрған шақта оң аяғынан қатты ауырсыну сезіп, құлап түсті. Бұл сәтті көрген жанкүйерлер мен комментаторлар бірден ахилл сіңірі үзілген болуы мүмкін деген болжам айтты.
Жарақат сәті — бірінші ширектің аяқталуына 4:55 минут қалғанда тіркелді. Дәрігерлер дереу алаңға жүгіріп келіп, Халибертонды зембілмен алып кетті.
Тайриз бұған дейін де оң жақ балтырының тартылуына байланысты алаңға күмәнмен шыққан болатын. Дегенмен командасының жеңісі үшін күресуге бел буып, паркетке шыққан.
"Мен командаластарымды қиын сәтте жалғыз қалдырғым келмеді. Бұл финал. Егер ойнай алсам — ойнаймын", — деді Халибертон ойын алдында.
Ол жарақат алғанша үш бірдей үш ұпайлық соққы жасап үлгерді. Алайда ауырсыну күшейіп, ойынды жалғастыру мүмкін болмады.
Халибертон — "Индиана Пэйсерс" құрамындағы көшбасшылардың бірі. Оның жарақаты команда үшін үлкен соққы болды. Егер ахилл сіңірі шынымен үзілген болса, бірнеше айға алаңнан шеттетілуі мүмкін.
