Алты баланың әкесі, спортшы Нұрбол Бердіғалиев құдыққа құлаған баланы құтқарамын деп қаза тапты. Жесірі мен балалары көмекке мұқтаж.
17 маусымда Жарлы ауылында 9 жасар қызды құтқаруға тырысып, құдыққа түсіп қаза тапқан 38 жастағы жаттықтырушы Нұрбол Бердіғалиевтің артында алты баласы мен жесірі қалды. Батырлықпен қаза тапқан спортшының отбасы бүгінгі күні жалғыз табыс көзі – 94 мың теңге жәрдемақымен күн кешіп отыр.
Марқұмның жұбайы Ақбаян Бақтыбайдың айтуынша, Нұрбол – еңбекқор, мейірімді әке, жауапты отағасы болған.
"Ол үйге тек түскі асқа бір келіп кететін. Қалған уақытын жұмысына, жаттығуға арнайтын. Балаларымызды қатты жақсы көретін, тәрбиесіне көп көңіл бөлетін. Әке ретінде де, тәлімгер ретінде де өте жанашыр адам еді", – дейді Ақбаян.
12 жыл отасқан ерлі-зайыптының балалары бүгінде 11, 10, 7, 6 және 3 жаста, кенжесі небәрі 5 айлық сәби.
Нұрбол Бердіғалиев тек жаттықтырушы емес, шәкірттеріне тірек бола білген нағыз жанашыр еді. Оның шәкірттері жарыстарда жеңіске жеткен сайын демеушілер іздеп, оларға барынша қолдау көрсетуге тырысатын.
"Мен кейде "уақытыңды шәкірттеріңе тым көп арнайсың" деп айтатынмын. Сонда ол: "Олардың жеңісі – менің жемісім", – дейтін," – деп еске алады жары.
Бердіғалиевтер отбасы 2019 жылы мемлекеттік бағдарлама арқылы баспаналы алған. Үй толық төленбей, әлі мемлекет меншігінде.
"Күйеуім төлемдерді соңғы күніне дейін өзі реттеп жүретін. Енді мен алты баламен жалғыз қалдым. Үйдің болашағына алаңдаймын", – дейді Ақбаян.
Ақбаянның айтуынша, олар болашақта шағын бизнес ашуды жоспарлаған. Жолдасы оған арнайы асхана салып берген.
"Фастфуд әзірлеп сату – сүйікті ісім еді. Қазір кішкентай балам болғандықтан бәрі тоқтап тұр. Нұрбол мені әрдайым қолдайтын," – дейді жесірі.
Қазір бұл отбасы мемлекеттің шағын көмегімен ғана күн көріп отыр. Басқа табыс көзі жоқ. Алты баламен жалғыз қалған ана қоғамнан қолдау күтеді.
