Шешуші кездесуде отандастарымыз Марокко құрамасын жеңді.
Оңтүстік Кореяның Чхунчхон қаласында басталған таеквондодан командалық әлем кубогында Қазақстанның ерлер құрамасы қола жүлдегер атанды. Бұл — ұлттық құраманың халықаралық аренадағы маңызды жетістіктерінің бірі.
Үшінші орын үшін өткен жекпе-жекте отандастарымыз Марокко құрамасын 2:1 есебімен жеңді. Жеңіс әкелген команда құрамында Бекасыл Ергеш, Абдрахман Марипов, Мерген Ғаниев және Нұрбек Ғазез өнер көрсетті.
Турнир барысында қазақстандықтар іріктеу кезеңінде Үндістанды жеңіп, жартылай финалда Оңтүстік Кореяға 1:2 есебімен жол берді. Осы нәтиже арқылы ерлер құрамасы жыл соңында өтетін негізгі әлем кубогына жолдама жеңіп алды.
Ертең Чхунчхонда әйелдер арасындағы командалық жарыс басталады. Қазақстан қыздары алғашқы кездесуін Қытай құрамасына қарсы өткізеді.
