Халықаралық конькишілер одағының (ISU) тәртіптік комитеті қазақстандық шорт-трекші Еркебұлан Шамұхановты спорттан шеттетті.
2024 жылдың 27 қазанында Канадада өткен Әлем кубогы кезеңінде алынған сынамадан спортшының қанында Trimetazidine атты тыйым салынған препарат табылды.
Бұл зат жүрекке қан ағымын күшейтіп, глюкоза алмасуын жеделдетеді, нәтижесінде спортшының төзімділігін арттырады. Сондықтан ол WADA-ның тыйым салынған препараттар тізіміне енгізілген.
ISU шешіміне сәйкес, Шамұханов 2024 жылдың 27 қазанынан бастап 2028 жылдың 26 қазанына дейін барлық жарыстарға қатыса алмайды. Осылайша ол 2026 жылы Миланда өтетін Қысқы Олимпиада ойындарын да жіберіп алады.
Қазақстан конькишілер одағының мәліметінше, спортшы 2025 жылдың басында ауыр жарақатына байланысты кәсіби мансабын аяқтағанын жариялаған. Дегенмен тыйым салынған заттың ағзаға кездейсоқ түсу ықтималдығы дәлелденбеді. Сол себепті шешім WADA Антидопинг кодексі мен ISU ережелеріне сәйкес қабылданды.
26 жастағы конькиші ұлттық құраманың тұрақты мүшесі болды. Ол әлем кубогы кезеңдерінде де, әлем чемпионаттарында да жеке қашықтықтарда және эстафеталық жарыстарда ел намысын қорғады.
Спортшының басты жетістіктеріне Қысқы Универсиадада жеңіп алған екі медалі және 2018 жылғы Олимпиада ойындарына қатысуы жатады.
