Ливерпульдегі чемпиондық парад кезінде жанкүйерлер тобына көлікпен кіріп кеткен ер адамға қатысты сот үкімі шықты. 54 жастағы Пол Дойл сот шешімімен 21 жыл 6 айға бас бостандығынан айырылды.
Сотта Дойл 31 айып тармағы бойынша кінәсін мойындаған. Айыптардың қатарында қауіпті көлік жүргізу, ауыр дене жарақатын қасақана келтіру және төбелеске қатысу сияқты баптар бар екені айтылды.
Судья Эндрю Менэри айыпталушының әрекетін «түсініксіз ашу-ызаға» балап, оның қоғамдық ортада қорқыныш пен дүрбелең тудырғанын атап өтті.
Қайғылы жағдай 2025 жылғы 26 мамырда (кешкі уақыт) Англия Премьер-лигасындағы «Ливерпульдің» чемпиондық мерекесі кезінде Ливерпуль қаласының орталығында болған. Полиция күдіктіні сол күні-ақ ұстаған.
Халықаралық БАҚ мәліметінше, оқиға кезінде 130-дан астам адам жарақат алған, олардың арасында 6 айлық сәби де бар.
Бұған дейін алғашқы хабарламаларда 47 адамның жарақаттанғаны, 20-сының ауруханаға жеткізілгені айтылған.
