Қазақстандық мәнерлеп сырғанаушы Михаил Шайдоров 2026 жылғы Қысқы Олимпиада ойындарында жүлдеге ілігуі мүмкін. Бұл туралы Olympics.com ерлер арасындағы бәсеке туралы шолуында атап өтті.
Olympics.com дерегінше, ерлер бағдарламасында төрт төрттік секіруді жоспарлағандар тізімінде Қазақстан өкілі Михаил Шайдоров та бар. Сондай-ақ бұл қатарда Юма Кагияма, Као Миура, Адам Сяо Хим Фа, Ника Эгадзе есімдері аталады.
Ерлер арасындағы қысқа бағдарлама 10 ақпанда өтті. Осы прокаттың қорытындысында Шайдоров 92,94 ұпай жинап, 5-орынға жайғасты.
Olympics.com материалы Шайдоровтың техникалық арсеналындағы ерекше элементтерге де тоқталады. Атап айтқанда, оның қоржынында сирек кездесетін үштік аксель – төрттік тулуп каскады бар екені жазылады. Сонымен қатар қазақстандық спортшымен бірге 1994 жылғы Олимпиада чемпионы Алексей Урманов жұмыс істейді. Бұл да шешуші старт алдында маңызды фактор ретінде бағаланады.
Енді негізгі сұрақ — еркін бағдарлама. Дәл осы кезеңде Олимпиада-2026 ерлер сайысындағы медаль иелері анықталады. Шайдоров қысқа бағдарламадан кейін үздік бестікте келе жатқандықтан таза әрі сенімді прокат жасаса, жүлде үшін күресуге толық мүмкіндік бар.
