Қазақстан Олимпиадаға енді шектен тыс үлкен делегация жібере алмайды

Спорт делегацияларына қатысты жаңа талап

ҚР Туризм және спорт министрлігі кешенді жарыстарға қатысатын қазақстандық спортшыларды сүйемелдейтін мамандардың санын реттейтін жаңа нормативті бекітті.

Бұл шешім Жоғары аудиторлық палатаның жүргізген тексерісінен кейін қабылданған. Аудиторлар министрлікке спортшылар санына шаққанда бапкерлер, кешенді ғылыми топ мүшелері, штаб өкілдері және ресми тұлғалардың оңтайлы арақатынасын белгілеуді тапсырған.

Жаңа талаптар Олимпиада ойындары, Азия ойындары және басқа да ірі халықаралық кешенді жарыстарға қатысты қолданылады.

Делегация құрамы нақты пропорциямен жасақталады

Жаңа норматив Туризм және спорт министрінің 2026 жылғы 8 шілдедегі бұйрығымен бекітілді.

Енді әр жарысқа баратын делегацияның құрамы алдын ала белгіленген нақты пропорциялар негізінде жасақталады. Соның арқасында іссапар мен жарысқа қатысуға жұмсалатын бюджет шығындарын жоспарлау және олардың тиімділігін бақылау жеңілдейді.

Сонымен қатар басымдық спортшылармен тікелей жұмыс істейтін мамандарға беріледі. Олардың қатарында бапкерлер, дәрігерлер және спортшылардың дайындығы мен денсаулығына жауапты өзге де қызметкерлер бар.

Токио Олимпиадасына дайындық кезіндегі проблема

Бұған дейін Жоғары аудиторлық палата Токио-2020 Олимпиадасына дайындыққа бөлінген мемлекеттік қаражаттың қаншалықты тиімді пайдаланылғанын тексерген.

Аудит барысында Қазақстан құрамасының делегациясын жасақтауда бірыңғай норматив болмағаны анықталды. Яғни бір спортшыға қанша бапкер, дәрігер, массажист, психолог, штаб мүшесі немесе ресми тұлға тиесілі болуы керектігі нақты белгіленбеген.

Осының салдарынан әр жарыста сүйемелдеуші мамандардың саны жеке тәртіппен анықталып келген. Бұл олардың іссапар шығындарының қаншалықты негізді екенін объективті бағалауға мүмкіндік бермеген.