Қазақстандық таеквондошы Париждегі Гран-приде қола жүлде жеңіп алды
Финалға шығу үшін өткен кездесуде Севостьянова Бразилия спортшысы Мария Клара Пачекомен кездесті.
Қазақстан құрамасының таеквондошысы Мария Севостьянова Франция астанасы Парижде өткен Гран-при кезеңінде қола медаль иеленді.
Қазақстандық спортшы 57 келіге дейінгі салмақ дәрежесінде сынға түсіп, турнир барысында үш кездесуінде жеңіске жетті.
Алғашқы екі қарсыласын 2:0 есебімен ұтты
Севостьянова жарысты Қытай Тайбэйінің өкілі Вэй Чунь Линьге қарсы бастады. Қазақстандық таеквондошы қарсыласын 2:0 есебімен жеңді.
Келесі айналымда ол Венгрия спортшысы Лука Патакфалвиден де дәл осындай есеппен – 2:0 басым түсті.
Ширек финалда Мария Севостьянова Өзбекстан өкілі Мадина Мирабзаловаға қарсы шықты. Қазақстандық спортшы бұл жекпе-жекте де 2:0 есебімен жеңіске жетіп, жартылай финалға жолдама алды.
Финалға шығу үшін өткен кездесуде Севостьянова Бразилия спортшысы Мария Клара Пачекомен кездесті. Бұл жолы қазақстандық таеквондошы 0:2 есебімен жеңіліп, жарысты қола жүлдемен аяқтады.
Гран-при финалы Астанада өтеді
Таеквондодан Гран-при сериясының финалы 27-29 қараша аралығында Астанада өтеді.