2028 жылы өтетін ауыр атлетикадан әлем чемпионатының қай қалада ұйымдастырылатыны белгілі болды. Бұл жарыс Лос-Анджелесте өтетін Олимпиада ойындары (14-30 шілде) алдындағы соңғы іріктеу турнирі болмақ.
Халықаралық ауыр атлетика федерациясы (IWF) бұл ауқымды жарысты Қазақстан астанасында өткізуді ұйғарды. Ресми сайттың мәліметінше, чемпионат Астанада 2028 жылдың сәуір немесе мамыр айында өтеді. Бірақ нақты күндері кейінірек жарияланады.
Бұл маңызды шешім IWF президенті Мұхаммед Джалуд Әл-Шаммаридің қаңтар айында Қазақстан Президенті Қасым-Жомарт Тоқаевпен Ақордадағы кездесуінен кейін қабылданды.
Қазақстан бұған дейін де әлем чемпионатын қабылдаған. 2014 жылы Алматыда өткен бұл жарыс еліміз үшін үлкен мәртебе болған.
Алайда кейінгі жылдары допинг дауларына байланысты IWF біздің елде ірі турнирлер өткізуден бас тартқан еді.
