Қазақстандық теннис жұлдызы өз шеберлігін тағы бір мәрте дәлелдеді.
Әлемнің 12-ракеткасы, қазақстандық теннисші Елена Рыбакина Францияның Страсбург қаласында өтіп жатқан беделді WTA-500 санатындағы турнирде сенімді өнер көрсетуде. Екінші айналымда ол Қытай өкілі, WTA рейтингінде 42-орында тұрған Ван Синьюйді 6:1, 6:3 есебімен жеңіп, жарыстың ширек финалына шықты.
Ойын небәрі 1 сағат 5 минутқа созылды, бұл Рыбакинаның қарсыласынан әлдеқайда мықты болғанын көрсетті.
Елена мен Ван бұған дейін бір рет кездескен. Ол матчта да қазақстандық теннисші басымдық танытып, 7:6, 6:2 есебімен жеңіске жеткен. Бұл жолғы жеңіс те Рыбакинаның тұрақты формасын және психологилық артықшылығын дәлелдеді.
Ширек финалда Елена Рыбакина поляк спортшысы Магда Линеттпен кортта жолығады. Линетт те тәжірибелі ойыншы. Дегенмен қазіргі формасына қарағанда Еленаның мүмкіндігі жоғары деп бағалануда.
