17 жастағы қазақстандық теннисші Амир Омарханов Италиядағы жұптық турнирде финалға шығып, ATP жұптық рейтингінде бірден 374 позицияға жоғарылады. Бұл – оның кәсіби мансабындағы ең ірі серпілістердің бірі.
Амир Омарханов италиялық Александр Биндамен жұп құрып, Италияның Реджо-Эмилия қаласында өткен ITF M25 турнирінің финалына дейін жетті. Финалда олар италиялық Томмазо Компаньюччи мен ресейлік Кирилл Киватцевтен 0:2 есебімен (4:6, 5:7) ұтылды.
Жеңіліске қарамастан, Омарханов ATP жұптық рейтингінде 374 сатыға көтеріліп, 1013-орынға жайғасты.
Амир Омарханов туралы теннис әлемінде алғаш рет 2024 жылдың басында өткен Australian Open жасөспірімдер турнирінен кейін айтыла бастады. Ол сол жарыста өз жас санатындағы әлемдік рейтинг көшбасшысын жарыстан шығарып, ширек финалға дейін жеткен болатын.
Амир 2007 жылы 17 қарашада Қарағандыда дүниеге келген. Тенниспен ерте жастан айналысып, 10 жасында-ақ өз жас санатында Қазақстан чемпионы атанды. 2021 жылдан бастап халықаралық деңгейге шыға бастады.
2024 жылдың сәуірінде Амир ATP турындағы алғашқы жарысына қатысып, Мадридтегі Masters турнирінде Wild Card иегері ретінде кәсіби дебют жасады.
2025 жылдың басында ол жасөспірімдер арасында әлемдік топ-5 рейтингке енді.
