Александр Шевченко Словакиядағы турнирдің жартылай финалына шықты
Қазақстанның екінші ракеткасы Братиславада ATP Challenger санатындағы турнирінде сәтті өнер көрсетуін жалғастыруда.
Ширек финалда чехиялық теннисшіні жеңді
Қазақстандық теннисші ширек финалда чехиялық Максим Мрвамен кездесті. Әлемдік рейтингте 312-орында тұрған қарсыласымен өткен матч тартысты басталғанымен Шевченко шешуші сәттерде сенімді ойнады.
Кездесу 1 сағат 30 минутқа созылды. Осы уақыт ішінде Александр Шевченко 4 эйс жасап, 1 қос қате жіберді. Сонымен қатар ол өз сервисінде бір геймді қарсыласына беріп қойса да, матч барысында 4 брейк орындады. Шевченко ширек финалдық кездесуде екі сет қорытындысы бойынша жеңіске жетті – 7:6, 6:4.
Айта кетейік, бұл екі теннисшінің корттағы алғашқы кездесуі болды. Бұған дейін олар ATP турнирлері аясында бір-біріне қарсы ойнамаған.
Финалға шығу үшін кіммен ойнайды?
Енді Александр Шевченко финал жолдамасы үшін өтетін жартылай финалда Петр Брунчик пен Виталий Сачко арасындағы матчтың жеңімпазымен кездеседі.