Елена Рыбакина Нинбодағы турнирдің жартылай финалына шықты
Қазақстандық теннисші Қытайдың Нинбо қаласында WTA 500 санатындағы турнирде кезекті жеңісіне жетті.
Үш сетке созылған матч
Рыбакина ширек финалдық бәсекеде әлемдік рейтингте 128-орында тұрған польшалық Катажина Кавамен кортқа шықты. Қазақстандық теннисші алғашқы партияда қарсыласын 6:1 есебімен жеңді. Бірақ екінші сетте Кава ойын тізгінін өз қолына алып, 6:3 нәтижесімен таразы басын теңестірді.
Шешуші үшінші партияда Рыбакина қайтадан өзінің жоғары деңгейін көрсетіп, қарсыласына мүмкіндік қалдырмады. Ол сетте 6:1 есебімен басым түсіп, кездесуді жеңіспен аяқтады.
Бұған дейін сенсация жасаған
Елена Рыбакина Нинбодағы жарысты екінші айналымнан бастаған. Ол алғашқы кездесуінде әлемдік рейтингте 105-орында тұрған өзбекстандық Полина Кудерметовамен ойнады.
Бірінші сетте есеп 5:0 болып, Рыбакина алға шыққан сәтте Кудерметова матчты жалғастырудан бас тартты. Осылайша қазақстандық теннисші келесі кезеңге өтті.
Ал Катажина Кава ширек финалға дейін турнирдің басты сенсацияларының бірін жасады. Польша өкілі әлемнің 14-ракеткасы, швейцариялық Белинда Бенчичті 7:5, 6:2 есебімен жеңді. Бұл Каваның кәсіби мансабындағы әлемдік рейтингтің үздік жиырмалығына кіретін теннисшіге қарсы алғашқы жеңісі болды.
Рыбакина жартылай финалда кіммен кездеседі?
Енді қазақстандық теннисші финалға шығу үшін әлемдік рейтингте 13-орында тұрған Диана Шнайдермен күш сынасады.
Шнайдер ширек финалда америкалық Ива Йовичті үш сетте жеңді.
Айта кетейік, Елена Рыбакина Нинбо турниріне қазіргі чемпион ретінде қатысып жатыр.